قصة تربوية أعدتها ستار فور لايف للأطفال!

ألّفت مؤسسة ستار فور لايف وتحديدا قسم التعليم قصة عشان تساعد الأطفال وقت الأزمات والطوارئ، ووقت ما يحسوا بخوف أو قلق أو مشاعر صعبة. طلعت القصة بعد تفكير وبحث وأسئلة كتيرة وإبداع فريق ستار فور لايف. الفكرة من القصة إنه الطفل اللي بيقرأها بعرف إنه مسموح يحس، وإنه كل مشاعره متاحه. ومن خلال مجريات القصة بيتعلم الطفل كيف يتعامل مع هاي المشاعر. وخلال ذلك، ركّزت القصة على تعليم الطفل حركات وألعاب ممكن يشاركوها مع العيلة أو الاصحاب. وهون الطفل بشارك أفراد عيلته وأصدقاءه في التعامل مع هاي المشاعر

بعد ما وزعت ستار فور لايف 3000 نسخة على الطلبة، سمعت الأخبار الطيبة! في جزء من الأهل حكالنا إنه القصة ساعدت أطفالهم في مواقف شعروا فيها بالخوف والقلق والتوتر. يعيني مثلاً إزا خافوا يناموا لحالهم كانوا يعبطوا حالهم متل الفراشة ويطبطبوا عحالهم ويحكوا قديش هم أقوياء، ولما يعصبوا كانوا يقوموا يدفعوا الحيط عشان يطلعوا كل الطاقة السلبية من ايديهم ويعطوها للحيط، او لما حسوا بتوتر قلدوا ماوكلي وتشقلبوا على الارض. هاد جزء من التغذية الراجعة اللي أعطتها بعض الأمهات لستار فور لايف. ففريقنا بفكّر إنه لو القصة وصلت لكل طفل بالعالم، قديش رح يساعد؟ وكم طفل بالعالم راح يقدر يتعامل مع مشاعره بثقة؟